|
|
| [1]לַמְנַצֵּחַ בִּנְגִינֹות עַל־הַשְּׁמִינִית מִזְמֹור לְדָוִד׃ |
[1]למנצח בנגינות על־השמינית מזמור לדוד |
| [2]יְהוָה אַל־בְּאַפְּךָ תֹוכִיחֵנִי וְאַל־בַּחֲמָתְךָ תְיַסְּרֵנִי׃ |
[2]יהוה אל־באפך תוכיחני ואל־בחמתך תיסרני |
| [3]חָנֵּנִי יְהוָה כִּי אֻמְלַל אָנִי רְפָאֵנִי יְהוָה כִּי נִבְהֲלוּ עֲצָמָי׃ |
[3]חנני יהוה כי אמלל־אני רפאני יהוה־כי נבהלו עצמי |
| [4]וְנַפְשִׁי נִבְהֲלָה מְאֹד וְאַתְּ [Q: וְאַתָּה] יְהוָה עַד־מָתָי׃ |
[4]ונפשי נבהלה מאד ואת [Q: ואתה] יהוה עד־מתי |
| [5]שׁוּבָה יְהוָה חַלְּצָה נַפְשִׁי הֹושִׁיעֵנִי לְמַעַן חַסְדֶּךָ׃ |
[5]שובה יהוה חלצה נפשי הושיעני למען חסדך |
| [6]כִּי אֵין בַּמָּוֶת זִכְרֶךָ בִּשְׁאֹול מִי יֹודֶה־לָּךְ׃ |
[6]כי אין במות זכרך בשאול מי יודה־לך |
| [7]יָגַעְתִּי בְּאַנְחָתִי אַשְׂחֶה בְכָל־לַיְלָה מִטָּתִי בְּדִמְעָתִי עַרְשִׂי אַמְסֶה׃ |
[7]יגעתי באנחתי־אשחה בכל־לילה מטתי בדמעתי ערשי אמסה |
| [8]עָשְׁשָׁה מִכַּעַס עֵינִי עָתְקָה בְּכָל־צֹורְרָי׃ |
[8]עששה מכעס עיני עתקה בכל־צוררי |
| [9]סוּרוּ מִמֶּנִּי כָּל־פֹּעֲלֵי אָוֶן כִּי־שָׁמַע יְהוָה קֹול בִּכְיִי׃ |
[9]סורו ממני כל־פעלי און כי־שמע יהוה קול בכיי |
| [10]שָׁמַע יְהוָה תְּחִנָּתִי יְהוָה תְּפִלָּתִי יִקָּח׃ |
[10]שמע יהוה תחנתי יהוה תפלתי יקח |
| [11]יֵבֹשׁוּ וְיִבָּהֲלוּ מְאֹד כָּל־אֹיְבָי יָשֻׁבוּ יֵבֹשׁוּ רָגַע׃ |
[11]יבשו ויבהלו מאד־כל־איבי ישבו יבשו רגע |