➕
←
1 Chronicles
1Ch
26
→
[1]ܦܵܠ̈ܓܘܵܬ̣ܵܐ ܕܬ̣ܵܪ̈ܥܹܐ ܕܐܲܩܝܼܡ ܕܵܘܝܼܕ݂ ܡܲܠܟܵܐ ܢܵܛܘܼܪܹ̈ܐ: ܡܫܲܠܝܵܐ ܡ̣ܢ ܒܢܵܘ̈ܗܝ ܕܝܵܘܣܸܦ. [2]ܘܠܲܡܫܲܠܝܵܐ ܗܘ̤ܵܘ ܠܹܗ ܒ̈ܢܲܝܵܐ ܕܸܟ݂ܪܹ̈ܐ: ܫܲܒ̣ܥܵܐ: ܙܟܲܪܝܵܐ ܒܘܼܟ݂ܪܹܗ: ܝܲܕ݂ܥܹܝܠ ܬܸܢܝܵܢܵܐ: ܙܟܲܪܝܵܐ ܬܠܝܼܬ̣ܵܝܵܐ: ܢܲܬ̣ܢܝܼܐܹܝܠ ܪܒ̣ܝܼܥܵܝܵܐ. [3]ܥܝܼܠܵܡ ܚܡܝܼܫܵܝܵܐ: ܝܘܿܚܲܢܵܢ ܫܬ̇ܝܼܬ̣ܵܝܵܐ: ܝܲܕ݂ܥܝܼ ܫܒ̣ܝܼܥܵܝܵܐ. [4]ܘܲܠܥܘܼܒ̣ܵܪ ܐܲܕ݂ܘܿܡ: ܗܘ̤ܵܘ ܠܹܗ ܒ̈ܢܲܝܵܐ. ܫܡܲܥܝܵܐ ܒܘܼܟ݂ܪܹܗ: ܝܵܗܘܿܙܵܒ̣ܵܢ ܬܸܢܝܵܢܵܐ: ܝܘܿܐܵܚ ܬܠܝܼܬ̣ܵܝܵܐ: ܫܵܒ̣ܵܪ ܪܒ̣ܝܼܥܵܝܵܐ: ܡܲܛܠܲܠ ܚܡܝܼܫܵܝܵܐ. [5]ܓܡܵܝܹܠ ܫܬ̇ܝܼܬ̣ܵܝܵܐ: ܐܝܼܣܵܟ݂ܵܪ ܫܒ̣ܝܼܥܵܝܵܐ: ܦܲܥܠܝܼ ܬܡܝܼܢܵܝܵܐ: ܡܸܛܠ ܕܒܲܪܟܹܗ ܡܵܪܝܵܐ. [6]ܘܠܲܫܡܲܥܝܵܐ ܒܪܹܗ:ܐܸܬ̣̱ܝܼܠܸܕ݂ܘ ܒ̈ܢܲܝܵܐ ܕܫܲܠܝܼܛܝܼܢ ܥܲܠ ܒܹܝܬ̣ ܐܲܒ̣ܵܗܵܬ̣̈ܗܘܿܢ: ܡܸܛܠ ܕܓܲܢ̄ܒܵܪ̈ܲܝ ܚܲܝܠܵܐ ܐܸܢܘܿܢ. [7]ܒܢܵܘ̈ܗܝ ܕܲܫܡܲܥܝܵܐ: ܓܲܥܬ̣ܵܐܹܝܠ: ܘܟܲܕ݂ܚܵܐܹܝܠ: ܘܥܘܼܒ̣ܕ݂ܵܐܹܝܠ: ܘܲܙܟܲܪܝܵܐ ܓܲܢ̄ܒܵܪ ܚܲܝܠܵܐ: ܘܐܹܠܝܼܵܐ: ܘܲܣܡܲܟ݂ܝܵܐ. [8]ܟܠܗܘܿܢ ܗܵܠܹܝܢ ܡ̣ܢ ܒܢܵܘ̈ܗܝ ܕܥܘܼܒ̣ܵܪ ܐܲܕ݂ܘܿܡ: ܗܸܢܘܿܢ ܘܲܒ̣ܢܲܝ̈ܗܘܿܢ ܘܐܲܚܲܝ̈ܗܘܿܢ ܓܲܢ̄ܒܵܪ̈ܲܝ ܚܲܝܠܵܐ: ܕܚܲܝܠܵܐ ܕܲܥܒ̣̈ܝܼܕ݂ܵܬ̣ܵܐ ܕܒܹܝܬ̣ ܡܲܩܕ̇ܫܵܐ. ܫܬ̇ܝܼܢ ܘܲܬ̣ܪܹܝܢ ܒܢܵܘ̈ܗܝ ܕܥܘܼܒ̣ܵܪ ܐܲܕ݂ܘܿܡ. [9]ܘܠܲܡܫܲܠܝܵܐ ܒܪܹܗ ܩܲܫܝܼܫܵܐ: ܒ̈ܢܲܝܵܐ ܓܲܢ̄ܒܵܪ̈ܲܝ ܚܲܝܠܵܐ: ܬܡܵܢܬܲܥܣܲܪ. [10]ܘܲܠܚܵܣܵܐ ܡ̣ܢ ܒܢܲܝ̈ ܡܪܵܪܝܼ: ܒ̈ܢܲܝܵܐ ܓܲܢ̄ܒܵܪ̈ܲܝ ܚܲܝܠܵܐ. ܘܲܒ̣ܪܹܗ ܩܲܫܝܼܫܵܐ ܡ̣ܝܼܬ̣ ܗ̄ܘ̣ܵܐ ܠܹܗ. ܘܐܲܩܝܼܡ ܐܲܒ̣ܘܼܗܝ ܠܲܕ݂ܒ̣ܵܬ̣ܪܹܗ ܪܹܫܵܐ. ܘܠܵܐ ܩܪܵܝܗܝ ܒܲܫܡܵܐ ܕܩܲܫܝܼܫܘܼܬ̣ܵܐ. [11]ܚܹܠܲܩܝܵܐ ܬܸܢܝܵܢܵܐ: ܛܒܲܥܝܵܐ ܬܠܝܼܬ̣ܵܝܵܐ: ܙܟܲܪܝܵܐ ܪܒ̣ܝܼܥܵܝܵܐ ܟܠ ܒ̈ܢܲܝܵܐ ܘܐܲܚܵܘ̈ܗܝ ܕܚܵܣܵܐ ܬܠܵܬܲܥܣܲܪ. [12]ܠܗܵܠܹܝܢ ܐܸܬ̣ܦܲܠܲܓ̣ܘ ܬܲܪ̈ܥܹܐ: ܠܹܪܫ ܐ̄ܢܵܫ ܡܲܛܲܪܬܵܐ ܠܘܼܩܒܲܠ ܐܲܚܲܝ̈ܗܘܿܢ: ܕܢܸܗܘܘܿܢ ܡܫܲܡܫܝܼܢ ܒܹܝܬ̣ ܡܲܩܕ̇ܫܵܐ. [13]ܘܐܲܪܡܝܼܘ ܦܸܨܹ̈ܐ: ܙܥܘܿܪܵܐ ܐܲܝܟ݂ ܪܲܒܵܐ ܠܒܹܝܬ̣ ܐܲܒ̣ܵܗܲܝ̈ܗܘܿܢ: ܠܬܲܪܥܵܐ ܘܬܲܪܥܵܐ. [14]ܘܢܸܦܠܲܬ̤ ܦܸܨܬ̣ܵܐ ܠܡܲܕ݂ܢ̱ܚܵܐ ܠܲܫܠܲܡܝܵܐ. ܘܲܙܟܲܪܝܵܐ ܒܪܹܗ:ܡܵܠܘܿܟ݂ܵܐ ܒܣܘܼܟܵܠܵܐ. ܐܲܪܡܝܼܘ ܦܸܨܹ̈ܐ: ܘܢܸܦܩܲܬ̤ ܦܸܨܬܹܗ ܠܓܲܪܒ̇ܝܵܐ. [15]ܠܥܘܼܒ̣ܵܪ ܐܲܕ݂ܘܿܡ ܠܬܲܝܡܢܵܐ. [16]ܠܲܒ̣ܢܵܘ̈ܗܝ ܒܹܝܬ̣ ܣܸܦܹ̈ܐ ܠܫܘܿܦܝܼܡ: ܘܲܠܚܘܼܣܵܐ ܠܡܲܥ̱ܪܒ̣ܵܐ: ܥܕܲܡܵܐ ܠܬܲܪܥܵܐ ܕܡܲܬ̣ܩܲܢ ܒܲܫܒ̣ܝܼܠܵܐ ܕܣܵܠܹ̇ܩ. [17]ܡܲܛܲܪܬܵܐ ܠܘܼܩܒܲܠ ܡܲܛܲܪܬܵܐ ܠܡܲܕ݂ܢ̱ܚܵܐ: ܠܹܘܵܝܹ̈ܐ ܫܬܵܐ ܠܡܲܕ݂ܢ̱ܚܵܐ ܠܓܲܪܒ̇ܝܵܐ ܠܝܵܘ̈ܡܹܐ ܐܲܪܒ̇ܥܵܐ: ܘܲܠܬܲܝܡܢܵܐ ܠܝܵܘ̈ܡܵܐ ܐܲܪܒ̇ܥܵܐ: ܘܲܠܒܹܝܬ̣ ܣܸܦܹ̈ܐ ܬܪܹܝܢ ܬܪܹܝܢ. [18]ܠܦܲܪܒܲܪ ܠܡܲܥ̱ܪܒ̣ܵܐ: ܐܲܪܒ̇ܥܵܐ ܠܲܫܒ̣ܝܼ̈ܠܹܐ: ܬܪܹܝܢ ܠܦܲܪܒܲܪ. [19]ܗܵܠܹܝܢ ܦܵܠܓܘܵܬ̣ܵܐ ܕܬ̣ܵܪ̈ܥܹܐ ܕܲܒ̣ܢܵܘ̈ܗܝ ܕܩܘܿܪܚ: ܘܕܲܒ̣ܢܵܘ̈ܗܝ ܕܲܡܪܵܪܝܼ ܠܹܘܵܝܹ̈ܐ. [20]ܐܲܚܝܼܵܐ ܥܲܠ ܐܵܘܨܪܹ̈ܐ ܕܒܹܝܬ̣ ܐܲܠܵܗܵܐ: ܘܥܲܠ ܐܵܨܘܿܪܹ̈ܐ ܕܩܘܼܕ݂ܫܵܐ. [21]ܒܢܵܘ̈ܗܝ ܕܠܲܥܕܵܢ ܡ̣ܢ ܒܢܲܝ̈ ܓܸܪܫܘܿܢ: ܠܠܲܥܕܵܢ ܪܹ̈ܫܲܝ ܐܲܒ̣ܵـ̈ـܗܵܬ̣ܵܐ: ܠܠܲܥܕܵܢ ܓܲܪܫܘܿܢܵܝܵܐ. [22]ܢܲܚܠܝܼ: ܙܝܼܬ̣ܵܡ: ܘܝܘܼܐܹܝܠ ܐܲܚܵܘ̈ܗܝ: ܥܲܠ ܐܵܘܨܪܹ̈ܐ ܕܒܹܝܬ̣ ܡܵܪܝܵܐ. [23]ܠܥܲܡܪ̈ܲܡܵܝܹܐ: ܠܝܲܨܗܵܪ̈ܵܝܵܐ: ܠܚܸܒ̣ܪ̈ܘܿܢܵܝܹܐ. ܠܥܘܿܙ̈ܝܼܠܵܝܹܐ. [24]ܘܠܲܫܡܘܼܐܹܝܠ ܒܲܪ ܓܸܪܫܘܿܢ: ܒܲܪ ܡܘܼܫܹܐ: ܡܩܲܝܲܡ ܥܲܠ ܐܵܘܨܪܹ̈ܐ. [25]ܘܐܲܚܵܘ̈ܗܝ ܐܹܠܝܼܥܵܙܲܪ: ܪܚܲܒ̣ܝܵܐ ܒܪܹܗ:ܐܹܫܲܥܝܵܐ ܒܪܹܗ:ܝܘܿܪܵܡ ܒܪܹܗ:ܙܲܟ݂ܪܝܼ ܒܪܹܗ. [26]ܫܲܠܘܿܡܝܼܬ̣ ܒܪܹܗ ܗ̤ܘ ܫܲܠܘܿܡܝܼܬ̣ ܘܐܲܚܵܘ̈ܗܝ: ܥܲܠ ܟܠ ܐܵܘܨܪܹ̈ܐ ܕܩܘܼܕ݂ܫܹ̈ܐ: ܕܩܲܕܸ̇ܫ̣ ܕܵܘܝܼܕ݂ ܡܲܠܟܵܐ ܘܪܹ̈ܫܲܝ ܐܲܒ̣ܵـ̈ـܗܵܬ̣ܵܐ. ܘܪܵܘ̱ܪ̈ܒ̣ܵܢܹܐ ܕܐܲܠܦܹ̈ܐ ܘܲܕ݂ܡܲܐ̈ܘܵܬ̣ܵܐ. [27]ܘܪܵܘ̱ܪ̈ܒ̣ܵܢܹܐ ܕܚܲܝܠܵܐ ܡ̣ܢ ܩܪܵܒ̣ܵܐ: ܘܡ̣ܢ ܒܸܙܬ̣ܵܐ ܩܲܕܸ̇ܫܘ ܠܚܘܼܝܵܠܵܐ ܕܒܲܝܬܹ̇ܗ ܕܡܵܪܝܵܐ. [28]ܘܟ݂ܠ ܕܩܲܕܸ̇ܫ̣ ܫܡܘܼܐܹܝܠ ܚܲܙܵܝܵܐ: ܘܫܵܐܘܿܠ ܒܲܪ ܩܝܼܫ: ܘܐܲܒ̣ܢܝܼܪ ܒܲܪ ܢܝܼܪ: ܘܝܘܿܐܵܒ̣ ܒܲܪ ܨܘܿܪܝܼܵܐ: ܟܠ ܕܲܡܩܲܕܲܫ ܥܲܠ ܐܝܼܕ݂ܵܘ̈ܗܝ ܕܫܲܠܘܿܡܝܼܬ̣ ܘܕܲܐܚܵܘ̈ܗܝ. [29]ܠܝܲܨܗܵܪ̈ܝܹܐ: ܟܘܼܢܲܢܝܵܐ ܘܲܒ̣ܢܵܘ̈ܗܝ ܠܲܥܒ̣ܝܼ̈ܕ݂ܵܬ̣ܵܐ ܒܲܪ̈ܵܝܵܬ̣ܵܐ: ܥܲܠ ܝܼܣܪܵܝܹܠ: ܠܫܲܠܝܼܛܵܢܹ̈ܐ: ܘܲܠܕܲܝܵܢܹ̈ܐ. [30]ܘܲܠܚܸܒ̣ܪ̈ܘܿܢܵܝܹܐ: ܚܫܲܒ̣ܝܵܐ ܘܐܲܚܵܘ̈ܗܝ ܒܢܲܝ̈ ܚܲܝܠܵܐ: ܐܵܠܹܦ ܘܲܫܒܲܥܡܵܐܐ ܥܲܠ ܡܸܢܝܵܢܵܐ ܕܝܼܣܪܵܝܹܠ: ܘܡ̣ܢ ܥܸܒ̣ܪܵܐ ܕܝܘܿܪܕ̇ܢܵܢ: ܘܲܠܡܲܥ̱ܪܒ̣ܵܐ: ܠܟ݂ܠ ܥܒ̣ܝܼ̈ܕ݂ܵܬ̣ܵܐ ܕܡܵܪܝܵܐ ܘܲܠܦܘܼܠܚܵܢܵܐ ܕܡܲܠܟܵܐ. [31]ܠܚܸܒ̣ܪ̈ܘܿܢܵܝܹܐ: ܢܹܪܝܼܵܐ ܪܹܫܵܐ ܠܚܸܒ̣ܪ̈ܘܿܢܵܝܹܐ: ܠܬ̣ܵܘ̈ܠܕ݂ܵܬ̣ܗܘܿܢ ܠܒܹܝܬ̣ ܐܲܒ̣ܵܗܲܝ̈ܗܘܿܢ. ܒܲܫܢܲܬ̣ ܐܲܪܒ̇ܥܝܼܢ ܠܡܲܠܟ̇ܘܼܬܹܗ ܕܕ݂ܵܘܝܼܕ݂ ܐܸܬ̇ܬ̇ܒܲܥܘ: ܘܐܸܫܬܲܟܲܚܘ ܒܗܘܿܢ ܓܲܢ̄ܒܵܪ̈ܲܝ ܚܲܝܠܵܐ: ܒܝܲܥܙܝܼܪ ܕܓܸܠܥܵܕ݂. [32]ܘܐܲܚܵܘ̈ܗܝ ܒܢܲܝ̈ ܚܲܝܠܵܐ: ܬܪܹܝܢ ܐܲܠܦ̈ܝܼܢ ܘܲܫܒܲܥܡܵܐܐ ܪܹ̈ܫܲܝ ܐܲܒ̣ܵـ̈ـܗܵܬ̣ܵܐ: ܕܐܲܫܠܸܛ ܐܸܢܘܿܢ ܕܵܘܝܼܕ݂ ܡܲܠܟܵܐ ܥܲܠ ܒܢܲܝ̈ ܪܘܼܒܹܝܠ: ܘܲܒ̣ܢܲܝ̈ ܓܵܕ݂:ܘܥܲܠ ܦܸܠܓ̇ܘܼܬ̣ ܫܲܒ̣ܛܵܐ ܕܲܡܢܲܫܹܐ: ܠܟ݂ܠ ܦܸܬ̣ܓ̣ܵܡܵܐ ܕܐܲܠܵܗܵܐ ܘܦܸܬ̣ܓ̣ܵܡܵܐ ܕܡܲܠܟܵܐ.
 
Top