➖ »
«
➖ ➕
Aleppo Codex (~920)
Alep
Hegesippus
Hegesippus
←
Ezekiel
Eze
4
→
[1]ואתה בן אדם קח לך לבנה ונתתה אותה לפניך וחקות עליה עיר את ירושלם [No book]
[2]ונתתה עליה מצור ובנית עליה דיק ושפכת עליה סללה ונתתה עליה מחנות ושים עליה כרים סביב [No book]
[3]ואתה קח לך מחבת ברזל ונתתה אותה קיר ברזל בינך ובין העיר והכינתה את פניך אליה והיתה במצור וצרת עליה־אות היא לבית ישראל [No book]
[4]ואתה שכב על צדך השמאלי ושמת את עון בית ישראל עליו מספר הימים אשר תשכב עליו תשא את עונם [No book]
[5]ואני נתתי לך את שני עונם למספר ימים שלש מאות ותשעים יום ונשאת עון בית ישראל [No book]
[6]וכלית את אלה ושכבת על צדך הימיני [Q: הימני] שנית ונשאת את עון בית יהודה־ארבעים יום יום לשנה יום לשנה נתתיו לך [No book]
[7]ואל מצור ירושלם תכין פניך וזרעך חשופה ונבאת עליה [No book]
[8]והנה נתתי עליך עבותים ולא תהפך מצדך אל צדך עד כלותך ימי מצורך [No book]
[9]ואתה קח לך חטין ושערים ופול ועדשים ודחן וכסמים ונתתה אותם בכלי אחד ועשית אותם לך ללחם מספר הימים אשר אתה שוכב על צדך שלש מאות ותשעים יום־תאכלנו [No book]
[10]ומאכלך אשר תאכלנו־במשקול עשרים שקל ליום מעת עד עת תאכלנו [No book]
[11]ומים במשורה תשתה ששית ההין מעת עד עת תשתה [No book]
[12]ועגת שערים תאכלנה והיא בגללי צאת האדם־תעגנה לעיניהם [No book]
[13]ויאמר יהוה ככה יאכלו בני ישראל את לחמם טמא בגוים אשר אדיחם שם [No book]
[14]ואמר אהה אדני יהוה הנה נפשי לא מטמאה ונבלה וטרפה לא אכלתי מנעורי ועד עתה ולא בא בפי בשר פגול [No book]
[15]ויאמר אלי־ראה נתתי לך את צפועי [Q: צפיעי] הבקר תחת גללי האדם ועשית את לחמך עליהם [No book]
[16]ויאמר אלי בן אדם הנני שבר מטה לחם בירושלם ואכלו לחם במשקל ובדאגה ומים במשורה ובשממון ישתו [No book]
[17]למען יחסרו לחם ומים ונשמו איש ואחיו ונמקו בעונם [No book]
Source: unbound.biola.edu
 Source: www.earlychristianwritings.com
Top