➕
←
Ezekiel
Eze
43
→
[1]ܘܐܵܘܒ̇ܠܲܢܝ ܠܬܲܪܥܵܐ ܕܚܵܐܲܪ ܠܡܲܕܼܢ̣ܚܵܐ. [2]ܘܗܵܐ ܫܘܼܒ̣ܚܹܗ ܕܐܲܠܵܗܵܐ ܕܝܼܣܪܵܝܹܠ ܐܵܬܹ̇ܐ ܡ̣ܢ ܐܘܼܪܚܵܐ ܕܡܲܕܼܢ̱ܚܵܐ: ܘܩܵܠܹܗ ܐܲܝܟ ܩܵܠܵܐ ܕܡܲـ̈ـܝܵܐ ܣܲܓ̇ܝܼ̈ܐܹܐ: ܘܐܲܪܥܵܐ ܢܸܗܪܲܬ̤ ܡ̣ܢ ܫܘܼܒ̣ܚܹܗ. [3]ܐܲܝܟ ܚܸܙܘܵܐ ܕܲܚܙܹ̇ܝܬ̣ ܟܲܕܼ ܐܸܬܹܝ̇ܬ̣ ܠܲܡܚܲܒܵܠܘܼ ܠܲܡܕܼܝܼܢ̄ܬܵܐ: ܘܐܲܝܟ ܚܸܙܘܵܐ ܕܲܚܙܹ̇ܝܬ̣ ܥܲܠ ܢܗܲܪ ܟܒܲܪ: ܘܢܸܦܠܹ̇ܬ̣ ܥܲܠ ܐܲܦܲܝ̈. [4]ܘܫܘܼܒ̣ܚܹܗ ܕܡܵܪܝܵܐ ܥܲܠ ܠܒܲܝܬܵܐ: ܒܐܘܼܪܚܵܐ ܕܬܲܪܥܵܐ ܕܚܵܐܲܪ ܠܡܲܕܼܢ̱ܚܵܐ. [5]ܘܲܫܩܲܠܬܲܢܝ ܪܘܼܚܵܐ ܘܐܲܥܸܠܬܲܢܝ ܠܕܼܵܪܬܵܐ ܓܵܘܵܝܬܵܐ: ܘܲܚܙܹ̇ܝܬ̣ ܕܐܸܬ̣ܡ̱ܠܝܼ ܒܲܝܬܹ̇ܗ ܕܡܵܪܝܵܐ ܫܘܼܒ̣ܚܹܗ. [6]ܘܫܸܡܥܹ̇ܬ̣ ܡܸܕܸ̇ܡ ܕܐܸܡܲܪ ܠܝܼ ܡ̣ܢ ܓܵܘ ܒܲܝܬܵܐ: ܘܓܲܒ̣ܪܵܐ ܩܵܐܹ̇ܡ ܗ̄ܘܼܵܐ ܠܘܵܬ̣ܝ. [7]ܘܐܸܡܲܪ ܠܝܼ: ܒܲܪܢܵܫܵܐ: ܐܲܬ̣ܪܵܐ ܕܟ̣ܘܼܪܣܲܝ ܘܐܲܬ̣ܪܵܐ ܕܦܲܪ̈ܣܵܬ̣ܵܐ ܕܪܸ̈ܓ̣ܠܲܝ: ܕܫܵܪܹܐ ܐ̄ܢܵܐ ܒܲܝܢܵܬ̣ ܒܢܲܝ̈ ܝܑܼܣܪܵܝܹܠ ܠܥܵܠܲܡ: ܘܬ̣ܘܼܒ̣ ܠܵܐ ܢܸܬ̇ܛܲܢܦܘܼܢ ܕܒܹܝܬ̣ ܝܑܼܣܪܵܝܹܠ: ܘܬ̣ܘܼܒ̣ ܠܵܐ ܢܛܲܢܦܘܼܢ ܫܡܵܐ ܕܩܘܼܕܼܫܝ: ܗܸܢܘܿܢ ܘܡܲܠܟܲܝ̈ܗܘܿܢ ܒܙܵܢܝܘܼܬ̣ܗܘܿܢ: ܘܒܲܫ̈ܠܲܕܹ̇ܐ ܕܡܲܠܟܲܝ̈ܗܘܿܢ ܘܒܲܦܬܲܟ̣ܪ̈ܲܝܗܘܿܢ. [8]ܕܥܵܒ̣ܕ̇ܝܼܢ ܗ̄ܘܼܵܘ ܬܲܪ̈ܥܲܝܗܘܿܢ ܥܲܠ ܓܸܢ̄ܒ̣ ܬܲܪ̈ܥܲܝ: ܘܣܸܦܲܝ̈ܗܘܿܢ ܥܲܠ ܓܸܢ̄ܒ̣ ܣܸܦܲܝ̈: ܘܐܸܣܬ̣ܵܐ ܗܘ̤ܵܬ̣ ܒܲܝܢܲܝ ܘܲܠܗܘܿܢ: ܘܛܲܢܸܦܘ ܫܡܵܐ ܕܩܘܼܕܼܫܝ ܒܥܵܘܼܠܵܐ ܕܲܥܒܲܕܼܘ: ܘܐܲܣܝܼܦܹܬ̣ ܐܸܢܘܿܢ ܒܪܘܼܓ̣ܙܝ. [9]ܡܸܟܹ̇ܝܠ ܢܲܪܚ̄ܩܘܼܢ ܙܵܢܝܘܼܬ̣ܗܘܿܢ ܘܲܫ̈ܠܲܕܹ̇ܐ ܕܡܲܠܟܲܝ̈ܗܘܿܢ ܡ̣ܢ ܩܕܼܵܡܲܝ: ܘܐܸܫܪܹܐ ܒܲܝܢܵܬ̣ܗܘܿܢ ܠܥܵܠܲܡ. [10]ܘܐܲܢ̄ܬ̇ ܕܹܝܢ ܒܲܪܢܵܫܵܐ: ܚܵܘܵܝܗܝ ܠܒܲܝܬܵܐ ܗܵܢܵܐ ܠܲܕܼܒܹܝܬ̣ ܝܑܼܣܪܵܝܹܠ: ܘܢܸܬ̇ܬܲܟ̣ܣܘܼܢ ܡ̣ܢ ܥܵܘܼܠܗܘܿܢ ܕܐܲܥܠܝܼܘ ܒܝܼ: ܘܢܸܡܫܚܘܼܢܵܗ̇ ܠܲܕܼܡܘܼܬܹܗ. [11]ܘܐܸܢ ܐܸܬ̇ܬܲܟܸܣܘ ܡ̣ܢ ܡܸܕܸ̇ܡ ܕܲܥܒܲܕܼܘ: ܨܘܼܪ̈ܵܬܹܗ ܕܒܲܝܬܵܐ ܘܛܘܼܝܵܒܹܗ: ܘܡܲܥ̈ܠܵܢܵܘܗܝ ܘܡܲܦܩܵܢܵܘ̈ܗܝ: ܘܟ̣ܠܵܗ̇ ܨܘܼܪܬܹ̇ܗ: ܘܟ̣ܠܗܘܿܢ ܢܵܡܘܿܣܵܘ̈ܗܝ ܘܟ̣ܠܗܹܝܢ ܨܘܼܪ̈ܵܬܹܗ ܚܵܘܵܐ ܐܸܢܘܿܢ: ܘܲܪܫܘܿܡ ܠܥܹܢܲܝܗܘܿܢ: ܕܢܸܛܪܘܿܢ ܟܠܗܹܝܢ ܨܘܼܪ̈ܵܬܹܗ: ܘܟ̣ܠܹܗ ܪܘܼܫܡܹܗ ܘܢܸܥܒ̇ܕܼܘܼܢ ܐܸܢܘܿܢ. [12]ܗܵܢܵܘ ܚܸܙܘܵܐ ܕܒܲܝܬܵܐ ܥܲܠ ܪܹܫ ܛܘܼܪܵܐ: ܘܟ̣ܠܗܘܿܢ ܬܚܘܼܡܵܘ̈ܗܝ ܟܲܕܼ ܚܵܕܼܪܝܼܢ: ܩܕܼܘܿܫ ܩܘܼܕܼܫܹ̈ܐ ܐܸܢܘܿܢ. [13]ܗܵܠܹܝܢ ܡܘܼܫ̈ܚܵܬܹܗ ܕܡܲܕܼܒ̇ܚܵܐ ܒܐܲܡܬ̣ܵܐ: ܕܐܲܡܵܐ ܘܲܦܫܸܟ: ܥܘܼܒܵܗ̇ ܕܐܲܡܬ̣ܵܐ ܐܲܡܵܐ: ܘܲܬ̣ܝܵܟ̣ܵܐ ܐܝܼܬ̣ ܠܣܸܦܬܹܗ ܙܪܸܬ̣ ܟܲܕܼ ܚܵܕܲܪ: ܘܗܵܟܲܢܵܐ ܒܓܲܒܹ̇ܗ. [14]ܘܡ̣ܢ ܐܲܪܥܵܐ ܘܲܥܕܲܡܵܐ ܠܲܬ̣ܝܵܟ̣ܵܐ ܬܲܚܬܵܝܵܐ: ܬܲܪܬܹ̇ܝܢ ܐܲܡܝܼ̈ܢ: ܘܲܦܬ̣ܵܝܹܗ ܐܲܡܬ̣ܵܐ ܚܕܼܵܐ: ܘܡ̣ܢ ܬܝܵܟ̣ܵܐ ܬܲܚܬܵܝܵܐ: ܘܲܥܕܲܡܵܐ ܠܥܸܠܵܝܵܐ ܐܲܪܒ̇ܥܲ ܐܲܡ̈ܝܼܢ: ܘܲܦܬ̣ܵܝܵܐ ܐܲܡܵܐ. [15]ܘܲܗܕܼܵܐܹܝܠ ܐܲܪܒܲܥ ܐܲܡ̈ܝܼܢ: ܘܡ̣ܢ ܗܕܼܵܐܹܝܠ ܘܲܠܥܸܠ ܩܲܪ̈ܢܵܬ̣ܵܐ ܐܲܪܒܲܥ. [16]ܘܐܘܼܪܟܹ̇ܗ ܕܲܗܕܼܵܐܹܝܠ ܬܲܪܬܲܥܸܣܪܹ̈ܐ ܐܲܡ̈ܝܼܢ: ܘܲܦܬ̣ܵܝܹܗ ܬܲܪܬܲܥܸܣܪܹ̈ܐ: ܡܪܲܒܲܥ ܠܐܲܪܒ̇ܥܵܐ ܣܸܛܪ̈ܵܘܗܝ. [17]ܘܲܬ̣ܝܵܟܹܗ ܐܲܪܒܲܥܸܣܪܹ̈ܐ ܐܲܡܝܼ̈ܢ ܐܘܼܪܟܹ̇ܗ: ܘܐܲܪܒܲܥܸܣܪܹ̈ܐ ܦܬ̣ܵܝܹܗ: ܥܲܠ ܐܲܪܒ̇ܥܵܐ ܣܸܛܪ̈ܵܘܗܝ: ܘܲܬ̣ܝܵܟܹܗ ܘܲܬ̣ܚܘܼܡܵܐ ܕܚܵܕܲܪ ܠܹܗ ܦܸܠܓܘܼܬ̣ ܐܲܡܵܐ: ܘܥܘܼܒܵܐ ܐܝܼܬ̣ ܠܹܗ ܟܲܕܼ ܚܵܕܲܪ: ܘܕܲܪ̈ܓ̣ܵܘܗܝ ܚܵܝ̇ܪܝܼܢ ܠܡܲܕܼܢ̱ܚܵܐ. [18]ܘܐܸܡܲܪ ܠܝܼ: ܒܲܪܢܵܫܵܐ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܠܹܝܢ ܢܵܡܘܿܣܵܘ̈ܗܝ ܕܡܲܕܼܒ̇ܚܵܐ ܒܝܵܘܡܵܐ ܕܡܸܬ̣ܥ̱ܒܸܕܼ: ܢܩܲܪܒ̣ܘܼܢ ܥܠܵܘܗܝ ܥܠܵܬ̣ܵܐ: ܘܢܹܐܫܕ̇ܘܼܢ ܥܠܵܘܗܝ ܕܡܵܐ. [19]ܘܐܸܬܸ̇ܠ ܠܟ̣ܵܗܢܹ̈ܐ ܘܲܠܠܹܘܵܝܹ̈ܐ ܕܡ̣ܢ ܙܲܪܥܹܗ ܕܨܵܕܼܘܿܩ: ܕܡܸܬ̣ܩܲܪܒ̣ܝܼܢ ܠܘܵܬ̣ܝ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܠܲܡܫܲܡܫܘܼܬܲܢܝ: ܬܵܘܪܵܐ ܒܲܪ ܒܲܩܪܵܐ ܠܬܲܕܼܟ̇ܝܼܬ̣ܵܐ ܕܲܚܛܵܗܹ̈ܐ. [20]ܘܬܸܣܲܒ̣ ܡ̣ܢ ܕܡܹܗ: ܘܬܸܪܘܿܣ ܒܐܲܪܒܲܥ ܩܲܪ̈ܢܵܬܹܗ ܕܡܲܕܼܒ̇ܚܵܐ: ܘܒܲܐܪܒܲܥ ܙܵܘ̈ܝܵܬ̣ܵܐ ܕܲܬ̣ܝܵܟܹܗ: ܘܒܲܬ̣ܚܘܼܡܵܐ ܕܚܵܕܲܪ ܠܹܗ: ܘܬܸܪܘܿܣ ܥܠܵܘܗܝ ܘܢܸܬ̇ܕܲܟܸ̇ܐ. [21]ܘܬܸܣܲܒ̣ ܬܵܘܪܵܐ ܕܬܲܕܼܟ̇ܝܼܬ̣ܵܐ: ܘܢܲܣܩܘܼܢܹܗ ܥܲܠ ܓܲܒܹ̇ܗ ܕܒܲܝܬܵܐ: ܠܒܲܪ ܡ̣ܢ ܡܲܩܕ̇ܫܵܐ. [22]ܘܲܒ̣ܝܵܘܡܵܐ ܕܲܬ̣ܪܹܝܢ: ܩܲܪܸܒ̣ ܠܬܲܕܼܟ̇ܝܼܬ̣ܵܐ: ܨܸܦܪܵܝܵܐ ܕܥܸܙܹ̈ܐ ܕܠܲܝܬ̇ ܒܹܗ ܡܘܼܡܵܐ: ܘܲܢܕܲܟ̇ܘܿܢܹܗ ܠܡܲܕܼܒ̇ܚܵܐ: ܐܲܝܟ ܕܕܲܟ̇ܝܼܘܗܝ ܒܬ̣ܵܘܪܵܐ. [23]ܘܡܵܐ ܕܫܲܡ̣ܠܝܼܬ̇ ܠܲܡܕܲܟܵܝܘܼ: ܩܲܪܸܒ̣ ܬܵܘܪܵܐ ܒܲܪ ܒܲܩܪܵܐ ܕܠܲܝܬ ܒܹܗ ܡܘܼܡܵܐ: ܘܕܸܟ̣ܪܵܐ ܡ̣ܢ ܥܵـ̈ـܢܵܐ ܕܠܲܝܬ̇ ܒܹܗ ܡܘܼܡܵܐ. [24]ܘܩܲܪܸܒ̣ ܐܸܢܘܿܢ ܩܕܼܵܡ ܡܵܪܝܵܐ: ܘܢܲܪܡܘܿܢ ܥܠܲܝܗܘܿܢ ܟܵܗܢܹ̈ܐ ܡܸܠܚܵܐ: ܘܲܢܩܲܪܒ̣ܘܼܢ ܐܸܢܘܿܢ ܝܲܩ̈ܕܹ̇ܐ ܫܲܠܡܹ̈ܐ ܠܡܵܪܝܵܐ. [25]ܘܲܬ̣ܩܲܪܒ̣ܘܼܢ ܫܲܒ̣ܥܵܐ ܝܵܘ̈ܡܝܼܢ: ܨܸܦܪܵܝܵܐ ܚܲܕܼ ܒܝܵܘܡܵܐ ܠܬܲܕܼܟ̇ܝܼܬ̣ܵܐ: ܘܬ̣ܵܘܪܵܐ ܚܲܕܼ ܒܲܪ ܒܲܩܪܵܐ: ܘܕܸܟ̣ܪܵܐ ܡ̣ܢ ܥܵـ̈ـܢܵܐ ܕܠܲܝܬ̇ ܒܹܗ ܡܘܼܡܵܐ. [26]ܢܸܗܘܘܿܢ ܡܩܲܪܒ̣ܝܼܢ ܫܲܒ̣ܥܵܐ ܝܵܘܡ̈ܝܼܢ: ܘܲܢܕܲܟ̇ܘܿܢܹܗ ܠܡܲܕܼܒ̇ܚܵܐ ܘܲܢܫܲܠܡܘܼܢ ܐܝܼܕܲܝ̈ܗܘܿܢ. [27]ܘܡܵܐ ܕܲܫܠܸܡ̣ܘ ܝܵܘ̈ܡܵܬ̣ܵܐ ܡ̣ܢ ܝܵܘܡܵܐ ܕܫܲܒ̣ܥܵܐ ܘܲܠܗܲܠ: ܗܵܝܕܹ̇ܝܢ ܢܩܲܪܒ̣ܘܼܢ ܟܵܗܢܹ̈ܐ ܥܲܠ ܡܲܕܼܒ̇ܚܵܐ: ܝܲܩܕܲܝ̈ܗܘܿܢ ܫܲܠܡܹ̈ܐ ܘܩܘܼܪ̈ܒܵܢܲܝܗܘܿܢ: ܘܐܸܨܛܒܸܐ ܒܗܘܿܢ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.
 
Top