➕
←
Ezekiel
Eze
44
→
[1]ܘܐܲܗܦ̣ܟܲܢܝ ܠܐܘܼܪܚܵܐ ܕܬܲܪܥܵܐ ܒܲܪܵܝܵܐ ܕܡܲܩܕ̇ܫܵܐ ܕܚܵܐܲܪ ܠܡܲܕܼܢ̱ܚܵܐ: ܘܲܚܙܹ̇ܝܬܹܗ ܕܐܲܚܝܼܕܼ. [2]ܘܐܸܡܲܪ ܠܝܼ ܡܵܪܝܵܐ: ܬܲܪܥܵܐ ܗܵܢܵܐ ܢܸܗܘܹܐ ܐܲܚܝܼܕܼ: ܘܠܵܐ ܢܸܬ̣ܦܬܲܚ: ܘܐ̄ܢܵܫ ܠܵܐ ܢܸܥܘܿܠ ܒܹܗ: ܡܸܛܠ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ ܥܵܐܹ̇ܠ ܒܹܗ: ܢܸܗܘܹܐ ܐܲܚܝܼܕܼ. [3]ܡܕܲܒ̇ܪܵܢܵܐ ܢܸܬܸ̇ܒ̣ ܒܹܗ: ܘܢܹܐܟ̣ܘܿܠ ܠܲܚܡܵܐ ܩܕܼܵܡ ܡܵܪܝܵܐ: ܡ̣ܢ ܐܘܼܪܚܵܐ ܕܐܸܣܟ̇ܘܼܦܬ̣ܵܐ ܕܬܲܪܥܵܐ ܢܸܥܘܿܠ ܘܡܸܢܵܗ̇ ܢܸܦܘܿܩ. [4]ܘܐܲܥܠܲܢܝ ܠܐܘܼܪܚܵܐ ܕܬܲܪܥܵܐ ܓܲܪܒ̇ܝܵܝܵܐ ܕܲܩܕܼܵܡ ܒܲܝܬܵܐ: ܘܲܚܙܹ̇ܝܬ̣ ܕܐܸܬ̣ܡ̱ܠܝܼ ܒܲܝܬܵܐ ܫܘܼܒ̣ܚܹܗ ܕܡܵܪܝܵܐ: ܘܢܸܦܠܹ̇ܬ̣ ܥܲܠ ܐܲܦܝ̈. [5]ܘܐܸܡܲܪ ܠܝܼ ܡܵܪܝܵܐ: ܒܲܪܢܵܫܵܐ: ܣܝܼܡ ܒܠܸܒܵܟ ܘܲܚܙܝܼ ܒܥܲܝܢܲܝ̈ܟ: ܘܲܫܡܲܥ ܒܐܸܕܼܢܲܝ̈ܟ ܟܠ ܡܸܕܸ̇ܡ ܕܲܡܡܲܠܸܠ ܐ̄ܢܵܐ ܥܲܡܵܟ: ܘܟ̣ܠܗܘܿܢ ܢܵܡܘܿܣܵܘ̈ܗܝ ܕܒܲܝܬܵܐ: ܘܟ̣ܠܗܹܝܢ ܨܘܼܪ̈ܵܬܹܗ: ܘܣܝܼܡ ܠܒ̣ܵܠܵܟ ܡܲܥܠܵܢܵܘ̈ܗܝ ܕܒܲܝܬܵܐ: ܘܡܲܦܩܵܢܵܘ̈ܗܝ ܕܡܲܩܕ̇ܫܵܐ. [6]ܘܐܸܡܲܪ ܠܒܲܝܬܵܐ ܕܝܼܣܪܵܝܹܠ ܡܡܲܪܡܪܵܢܵܐ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܠܵܐ ܟܲܕ̇ܘܼ ܠܟ̣ܘܿܢ ܟܠܵܗ̇ ܛܲܢܦܘܼܬ̣ܟ̣ܘܿܢ ܕܒܹܝܬ̣ ܝܑܼܣܪܵܝܹܠ. [7]ܐܸܠܵܐ ܐܵܦ ܡܲܝܬܹ̇ܝܢ ܐܲܢ̄ܬ̇ܘܿܢ ܡ̣ܢ ܒܢܲܝ̈ ܢܘܼܟ̣ܪ̈ܵܝܹܐ ܕܥܘܼܪܠܝܼܢ ܒܠܸܒ̇ܗܘܿܢ: ܘܥܘܼܪܠܝܼܢ ܒܒܸܣ̱ܪܗܘܿܢ: ܘܗܵܘܹ̇ܝܢ ܒܡܲܩܕܲܫܝ: ܘܲܡܛܲܢܦܝܼܢ ܒܲܝܬ̇ܝ: ܘܲܡܩܲܪܒ̣ܝܼܢ ܐ̄ܢܬ̇ܘܿܢ ܥܲܠ ܠܲܚܡܝ ܬܲܪܒܵܐ ܘܲܕܼܡܵܐ: ܘܲܡܒܲܛܠܝܼܢ ܐ̄ܢܬ̇ܘܿܢ ܩܝܵܡܝ ܒܟ̣ܠܵܗ̇ ܛܲܢܦܘܼܬ̣ܟ̣ܘܿܢ. [8]ܘܠܵܐ ܢܵܛ̇ܪܝܼܢ ܐ̄ܢܬ̇ܘܿܢ ܢܛܘܼܪ̈ܵܬ̣ܵܐ ܕܡܲܩܕܲܫܝ: ܐܸܠܵܐ ܥܒܲܕ̇ܬ̇ܘܿܢ ܢܵܛܪ̈ܲܝ ܡܲܛܲܪܬܵܐ ܕܡܲܩܕܲܫܝ ܢܵܛܘܿܪ̈ܲܝܟ̇ܘܿܢ ܕܝܼܠܟ̣ܘܿܢ. [9]ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܟܠ ܒܲܪ ܢܘܼܟ̣ܪ̈ܵܝܹܐ ܕܲܥܪܘܿܠ ܒܠܸܒܹ̇ܗ ܘܥܘܼܪܠܵܐ ܒܒܸܣܪܹܗ: ܠܵܐ ܢܸܥܘܿܠ ܠܡܲܩܕܲܫܝ: ܘܠܵܐ ܒܲܪ ܢܘܼܟ̣ܪ̈ܵܝܹܐ ܕܐܝܼܬ̣ ܒܲܝܢܵܬ̣ ܒܢܲܝ̈ ܝܑܼܣܪܵܝܹܠ. [10]ܐܵܦܠܵܐ ܠܹܘܵܝܹ̈ܐ ܕܲܦܪܲܩ̣ܘ ܡܹܢܝ: ܟܲܕܼ ܛܥܵܘ ܒܢܲܝ̈ ܝܑܼܣܪܵܝܹܠ ܡܹܢܝ ܒܵܬܲܪ ܦܬܲܟ̣ܪ̈ܲܝܗܘܿܢ: ܘܩܲܒܸ̇ܠܘ ܥܵܘܼܠܗܘܿܢ. [11]ܘܲܗܘ̤ܵܘ ܒܡܲܩܕܲܫܝ: ܘܲܡܫܲܡܫܝܼܢ ܗ̄ܘܼܵܘ ܒܬܲܪܥܵܐ ܕܒܲܝܬܵܐ: ܗܸܢܘܿܢ ܢܸܟ̇ܣܘܼܢ ܝܲܩ̈ܕܹ̇ܐ ܫܲܠܡܹ̈ܐ ܘܕܸܒ̣ܚܹ̈ܐ ܕܥܲܡܵܐ: ܘܗܸܢܘܿܢ ܢܩܘܼܡܘܿܢ ܩܕܼܵܡܲܝܗܘܿܢ ܘܲܢܫܲܡܫܘܼܢ ܐܸܢܘܿܢ. [12]ܥܲܠ ܕܫܲܡܸܫ̣ܘ ܐܸܢܘܿܢ ܩܕܼܵܡ ܦܬܲܟ̣ܪ̈ܲܝܗܘܿܢ: ܘܲܗܘ̤ܵܘ ܠܬ̣ܘܼܩ̱ܠܵܬ̣ܵܐ ܕܥܵܘܼܠܵܐ ܠܲܒ̣ܢܲܝ̈ ܝܑܼܣܪܵܝܹܠ: ܡܸܛܠܗܵܢܵܐ ܐܲܪܝܼܡܹ̇ܬ̣ ܐܝܼܕܼܝ ܥܠܲܝܗܘܿܢ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܘܩܲܒܸ̇ܠܘ ܥܵܘܼܠܗܘܿܢ. [13]ܘܠܵܐ ܢܸܩ̱ܪܒ̣ܘܼܢ ܩܕܼܵܡܲܝ ܠܲܡܫܲܡܵܫܘܼܬܲܢܝ: ܘܠܵܐ ܢܸܬ̣ܩܲܪܒ̣ܘܼܢ ܠܟ̣ܠܗܘܿܢ ܩܘܼܕܼܫܲܝ̈ ܒܹܝܬ̣ ܩܕܼܘܼܫ ܩܘܼܕܼܫܹ̈ܐ: ܘܲܢܩܲܒ̇ܠܘܼܢ ܟܠܵܗ̇ ܒܸܗܬܲܬ̣ܗܘܿܢ ܘܟ̣ܠܵܗ̇ ܛܲܢܦܘܼܬ̣ܗܘܿܢ ܕܲܥܒܲܕܼܘ. [14]ܘܐܸܥܒܸ̇ܕܼ ܐܸܢܘܿܢ ܢܵܛܪ̈ܲܝ ܡܲܛܲܪܬܵܐ ܕܒܲܝܬܵܐ: ܘܥܵܒ̣ܕܲܝ̈ ܥܒ̣ܵܕܼܵܐ ܕܟ̣ܠܡܸܕܸ̇ܡ ܕܗܵܘܹ̇ܐ ܒܹܗ. [15]ܘܟ̣ܵܗܢܹ̈ܐ ܘܠܹܘܿܝܹ̈ܐ ܒܢܲܝ̈ ܨܵܕܼܘܿܩ: ܕܲܢܛܲܪܘ ܡܲܛܲܪܬܵܐ ܕܡܲܩܕܲܫܝ: ܟܲܕܼ ܛܥܵܘ ܒܢܲܝ̈ ܝܑܼܣܪܵܝܹܠ ܡܹܢܝ: ܗܸܢܘܿܢ ܢܸܩ̱ܪܒ̣ܘܼܢ ܠܘܵܬ̣ܝ ܠܲܡܫܲܡܵܫܘܼܬܲܢܝ: ܘܗܸܢܘܿܢ ܢܩܘܼܡܘܼܢ ܩܕܼܵܡܲܝ: ܘܲܢܩܲܪܒ̣ܘܼܢ ܠܝܼ ܬܲܪܒܵܐ ܘܲܕܼܡܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ. [16]ܗܸܢܘܿܢ ܢܸܥܠܘܼܢ ܠܡܲܩܕܲܫܝ: ܘܗܸܢܘܿܢ ܢܸܩ̱ܪܒ̣ܘܼܢ ܠܦܵܬ̣ܘܿܪܝ: ܕܲܡܫܲܡܫܘܼܢܵܢܝ: ܘܢܸܛܪܘܼܢ ܢܛܘܼܪ̈ܵܬ̣ܝ. [17]ܘܡܵܐ ܕܥܵܐܠܝܼܢ ܒܬܲܪܥܵܐ ܕܕܼܵܪܬܵܐ ܓܵܘܵܝܬܵܐ: ܡܵܐܢܹ̈ܐ ܕܟܸܬܵܢܵܐ ܢܸܠܒܫܘܼܢ: ܘܲܕܼܥܲܡܪܵܐ ܠܵܐ ܢܸܠܒ̇ܫܘܼܢ: ܘܡܵܐ ܕܲܡܫܲܡܫܝܼܢ ܒܬܲܪܥܵܐ ܕܕܼܵܪܬܵܐ ܓܵܘܵܝܬܵܐ. [18]ܐܵܦ ܠܓ̣ܵܘ ܡܲܨܢ̈ܦܵܬ̣ܵܐ ܕܟܸܬܵܢܵܐ ܢܣܝܼܡܘܼܢ ܒܪܹ̈ܫܲܝܗܘܿܢ: ܘܲܦܪ̈ܵܙܘܿܡܹܐ ܕܟܸܬܵܢܵܐ ܢܹܐܣܪܘܼܢ ܒܚܲܨܲܝ̈ܗܘܿܢ. [19]ܘܡܵܐ ܕܢܵܦܩܝܼܢ ܠܕܼܵܪܬܵܐ ܒܲܪܵܝܬܵܐ ܠܘܵܬ̣ ܥܲܡܵܐ: ܢܸܫ̱ܠܚܘܼܢ ܡܵܐܢܲܝ̈ܗܘܿܢ ܕܲܡܫܲܡܫܝܼܢ ܒܗܘܿܢ: ܘܢܸܫܒ̇ܩܘܼܢ ܐܸܢܘܿܢ ܒܐܲܟ̣ܣܸܕܼܪܹ̈ܐ ܕܩܘܼܕܼܫܵܐ: ܘܢܸܠܒ̇ܫܘܼܢ ܡܵܐܢܹ̈ܐ ܐ̄ܚܪ̈ܵܢܹܐ: ܕܠܵܐ ܢܩܲܕ̇ܫܘܼܢܹܗ ܠܥܲܡܵܐ ܒܡܵܐܢܲܝ̈ܗܘܿܢ. [20]ܪܹ̈ܫܲܝܗܘܿܢ ܠܵܐ ܢܸܓܪ̱ܥܘܼܢ: ܘܩܵܘ̈ܨܵܬ̣ܗܘܿܢ ܠܵܐ ܢܪܲܒ̇ܘܿܢ: ܐܸܠܵܐ ܡܣܲܦܵܪܘܼ ܢܣܲܦܪܘܿܢ ܪܹ̈ܫܲܝܗܘܿܢ. [21]ܘܚܲܡܪܵܐ ܠܵܐ ܢܸܫܬ̇ܘܿܢ ܟܵܗܢܹ̈ܐ ܡܵܐ ܕܥܵܐܠܝܼܢ ܠܕܼܵܪܬܵܐ ܓܵܘܵܝܬܵܐ. [22]ܘܐܲܪܡܲܠܬܵܐ ܘܲܫܒ̣ܝܼܩܬܵܐ ܠܵܐ ܢܸܣܒ̣ܘܼܢ ܠܗܘܿܢ ܢܸܫܹ̈ܐ: ܐܸܠܵܐ ܐܸܢ ܒܬ̣ܘܼܠܬܵܐ ܡ̣ܢ ܙܲܪܥܵܐ ܕܝܼܣܪܵܝܹܠ: ܐܵܘ ܐܲܪܡܲܠܬܵܐ ܕܡܲܪܡ̄ܠܵܐ ܡ̣ܢ ܟܵܗܢܵܐ ܢܸܣܒ̣ܘܼܢ. [23]ܘܢܲܠܦܘܼܢ ܠܥܲܡܝ ܒܹܝܬ̣ ܩܘܼܕܼܫܵܐ ܠܚܘܼܠܵܐ: ܘܢܵܘܕ̇ܥܘܼܢܹܗ ܒܹܝܬ̣ ܡܣܲܝܒ̣ܵܐ ܠܕܲܟ̣ܝܵܐ. [24]ܘܥܲܠ ܕܝܼܢܹ̈ܐ ܗܸܢܘܿܢ ܢܩܘܼܡܘܼܢ ܠܲܡܕܼܵܢ: ܘܲܒ̣ܕܼܝܼ̈ܢܲܝ ܢܕܼܘܼܢܘܼܢ: ܘܢܵܡܘܿܣܲܝ̈ ܘܦܘܼܩ̈ܕܵܢܲܝ ܢܸܛܪܘܿܢ: ܒܟ̣ܠܗܘܿܢ ܙܲܒ̣ܢܹ̈ܐ ܕܡܵܘ̈ܥܕܲܝ: ܘܫܲܒܲܝ̈ ܢܩܲܕ̇ܫܘܼܢ. [25]ܘܥܲܠ ܡܝܼܬ̣ܵܐ ܕܒܲܪܢܵܫܵܐ ܠܵܐ ܢܸܥܠܘܿܢ ܕܠܵܐ ܢܸܣܬܲܝܒ̣ܘܼܢ: ܐܸܠܵܐ ܐܸܢ ܒܐܲܒ̣ܘܼܗܝ ܐܵܘ ܒܐܸܡܹܗ: ܐܵܘ ܒܲܒ̣ܪܹܗ: ܐܵܘ ܒܒܲܪܬܹܗ: ܐܵܘ ܒܐܲܚܘܼܗܝ: ܐܵܘ ܒܚܵܬܹܗ ܒܬ̣ܘܼܠܬܵܐ ܕܠܵܐ ܗ̄ܘܼܵܬ̣ ܠܓܲܒ̣ܪܵܐ ܢܸܣܬܲܝܒ̣ܘܼܢ. [26]ܘܡ̣ܢ ܒܵܬܲܪ ܕܡܸܣܬܲܝܲܒ̣: ܢܸܡܢܸܐ ܠܹܗ ܫܲܒ̣ܥܵܐ ܝܵܘܡܝܼ̈ܢ: ܘܗܵܝܕܹ̇ܝܢ ܢܸܬ̇ܕܲܟܸ̇ܐ. [27]ܘܲܒ̣ܝܵܘܡܵܐ ܕܥܵܐܹ̇ܠ ܠܡܲܩܕ̇ܫܵܐ ܠܕܼܵܪܬܵܐ ܓܵܘܵܝܬܵܐ ܠܲܡܫܲܡܵܫܘܼ ܒܩܘܼܕܼܫܵܐ: ܢܩܲܪܸܒ̣ ܬܲܕܼܟ̇ܝܼܬܹܗ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ. [28]ܘܬܸܗܘܹܐ ܠܗܘܿܢ ܠܝܘܼܪܬܵܢܵܐ: ܐܸܢܵܐ ܐ̄ܢܵܐ ܝܘܼܪܬܵܢܗܘܿܢ: ܘܲܡܢܵܬ̣ܵܐ ܠܵܐ ܬܸܬ̇ܠܘܼܢ ܠܗܘܿܢ ܒܝܼܣܪܵܝܹܠ: ܐܸܢܵܐ ܐ̄ܢܵܐ ܡܢܵܬ̣ܗܘܿܢ. [29]ܣܡܝܼܕܼܵܐ ܘܬܲܪܼܟ̇ܝܼܬ̣ܵܐ ܕܲܚܛܵܗܹ̈ܐ ܗܸܢܘܿܢ ܢܹܐܟ̣ܠܘܼܢ: ܘܟ̣ܠ ܚܸܪܡܵܐ ܕܒ̣ܝܼܣܪܵܝܹܠ ܕܝܼܠܗܘܿܢ ܢܸܗܘܹܐ. [30]ܘܪܹܫ ܟܠ ܒܘܼܟ̣ܪܹ̈ܐ ܕܟ̣ܠܹܗ ܦܘܼܪܫܵܢܵܐ ܕܦܵܪܫܝܼܢ ܐ̄ܢܬ̇ܘܿܢ: ܕܟ̣ܵܗܢܹ̈ܐ ܢܸܗܘܹܐ. ܘܪܹܫ ܐܵܨܘܵܬ̣̈ܟ̣ܘܿܢ ܗܲܒ̣ܘ ܠܟ̣ܵܗܢܹ̈ܐ: ܕܬܸܗܘܹܐ ܒܘܼܪܟ̇ܬ̣ܵܐ ܒܒ̣ܵܬܲܝ̈ܟ̇ܘܿܢ. [31]ܘܟ̣ܠ ܕܲܡܩܲܢܲܩ ܘܲܬ̣ܒ̣ܝܼܪ ܡ̣ܢ ܦܵܪܲܚܬܵܐ ܘܡ̣ܢ ܚܲܝ̄ܘܼܬ̣ܵܐ: ܠܵܐ ܢܹܐܟ̣ܠܘܼܢ ܟܵܗܢܹ̈ܐ.
 
Top